Sfidat e HR dhe Drejtuesve ne normalitetin e ri

Nga Monika Farka

Pas situatës jo normale për biznesin në këto muajt e fundit, HR dhe drejtues në gjithë botën po përballen me shumë sfida në lidhje me strategjitë e menaxhimit të talenteve në normalitetin e ri pas COVID-19.

AIMS International, një nga 10 kompanitë më të mëdha në botë në konsulencën për kapitalin njerëzor, me më shumë se 90 zyra në mbi 50 vende të botës, ka organizuar tryeza të rrumbullakëta virtuale për drejtuesit e lartë dhe liderët e bizneseve të kompanive, industrive dhe vendeve të ndryshme për të ndarë mënyrën se si janë përballur me COVID- 19. Diskutimi kryesor gjatë këtyre seancave ishte në lidhje me sfidat që ata po përballen dhe masat që kanë marrë për të siguruar qëndrueshmërinë e veprimtarive të biznesit gjatë këtyre kohëve të pasigurta.

Kjo ka qenë një mundësi shumë e mirë për drejtuesit të ndajnë eksperiencat dhe idetë se si të marrin vendime më të shpejta dhe më të mira për burimet njerëzore dhe të planifikojnë veprimtaritë pas Coronës.
Sfidat kryesore të paraqitura nga HR dhe Drejtuesit e bizneseve përfshijnë:

Pandemia e COVID-19 nuk është një “cështje HR”: por, vetë drejtuesit e lartë duhet të angazhohen dhe të bëhen më të arritshëm duke treguar anën e tyre njerëzore dhe të kujdesen për njerëzit. Papritur, jemi të vetëdijshëm se, përmes rritjes se takimeve online është e mundur për HR të përfshihet shpesh edhe me vendet më të largëta.

Shëndeti dhe siguria kanë marrë fokusin kryesor nga punëdhënësit, konsumatorët dhe punonjësit. Komunikimi i sinqertë dhe transparent është i rëndësishëm për të ndihmuar në zbutjen e niveleve të larta të ankthit në organizata. Mbështetja e burimeve njerëzore tani shtrihet nga individi tek familjet e punonjësve dhe madje edhe në komunitetet.

Puna në distancë ka përfitime të mëdha,por megjithëse ne kemi parë rritje të produktivitetit në shumë fusha në javët e para, kohet e fundit shohim ndikimin e cështjeve familjare. Si të ndryshojmë mendësitë tona për të akomoduar një stil pune më të integruar për prindërit mbetet ndër sfidat kryesore.

Mbajtja dhe angazhimi i stafit është një sfidë e madhe; Si të mbajmë dhe angazhojmë stafin tonë, vecanërisht ata që punojnë nga shtëpia? Si të integrojmë punonjësit e rinj kur nuk mund të organizojmë dot trajnime apo workshope prezantimi në punë?

Efektiviteti Organizacional (OE) duhet të ripërcaktohet. Disa kanë kuptuar që për të vepruar më shpejt plani i vazhdimësisë së biznesit të tyre ka ndryshuar nga metoda tradicionale nga lart-poshtë në një metodologji nga poshtë-lart. Fuqizimi i drejtuesve në bazë është bërë thelbësore. Vlerat që nxisin kulturën e kompanisë dhe veprimet po ndryshojnë – siguria dhe shëndeti vijnë të parat. Duhet analizuar cfarë do të thotë kjo për Efektivitetin Organizacional në biznesin tuaj.

Përgatituni për evolucionin e forcës punëtore – ekziston një hendek aftësish midis kërkesës për talente dhe ofertës, vecanërisht në 4 aftësi kritike për të ardhmen:
Inovacioni dhe kreativiteti – Përshtatshmëria dhe fleksibiliteti – Bashkëpunimi dhe Komunikimi – Njohuritë dhe Aftësitë për Biznes

Mendësia Dixhitale është bërë përparësi. Gjeni dhe mbani njerëz me mendësi dixhitale, jo domosdoshmërisht aftësi teknike dixhitale.

Si përfundim, profesionistët e HR po përballen me një sfidë të paprecendentë për shkak të kësaj pandemie, duke pasur nevojë të forcojnë kulturën dhe vlerat e organizatave të tyre. Nuk ka qenë kurrë më e rëndësishme të komunikosh në mënyrë të vazhdueshme dhe transparente, të jesh fleksibël, të tregosh humanizëm, dhe angazhosh stafin në të gjitha platformat.

Disa nga Sfidat në Shqipëri

Kërkesa në rritje për shërbime BPO po terheq gjithnjë e më shumë talente shqiptare në të gjitha nivelet, nga teknikët deri tek profilet e menaxherëve. Italia mbetet vendi kryesor me kërkesën më të lartë për shërbime të reja BPO, të ndryshme nga shërbimet e call centers.

Pritet largim i trurit intelektual pas hapjes-Shumë profesionistë shqiptar janë duke pritur hapjen e kufijve për të gjetur punë më të mira jashtë, ose i kane tashmë kontratat. Ndërkohë për shkak të pasigurisë, profesionistët e përshtatshëm për t’i zëvendësuar hezitojnë të konsiderojnë punëdhënës të rinj.

Pritet një rritje e pagave për pozicione kritike për shkak të luftës për talente. Kompanitë duhet të reagojnë me shpejtësi në plotësimin e boshllëqeve për talentet kyce duke atraktuar talente nga industri të tjera të prekura me shumë nga COVID.

Rritja e produktivitetit në distacë dhe motivimit të stafit. Faktorët që duhet të adresohen nuk kanë të bëjnë vetëm me infrastrukturën e IT dhe platformat online. Përkundrazi, ato kanë të bëjnë me menaxhimin e njerëzve, menaxhimin e performancës dhe krijimin e një kulture motivuese për punën në distancë. Kompanitë duhet të investojnë në ndërtimin e portofolit të aftësive të së ardhmes, duke përfshirë mendësinë dixhitale dhe aftësinë për të punuar në distancë dhe të trajnojnë stafin për këto aftësi. Mos hamendësoni se të rinjtë janë më të përgatitur. Një studim i fundit i SHL, vlerësues global i talenteve tregoi se të rinjtë shënuan më pak pikë se punonjësit me moshë me të larte në disa kompetenca kritike të nevojshme për normalitetin e ri.

Të jesh punëdhënës me reputacion nuk është akoma prioritet për bizneset. Kompanitë duhet të ri formulojnë strategjitë e menaxhimit të talenteve për të tërhequr dhe mbajtur talentet e duhura. Roli i Departamentit të BNJ si partner strategjik merr rëndësi të vecantë në këto kohë.